YMA FLAG LEH A KAIHNAWIH
Dt.9th .July.2011 (Pathianni) : Kan flag hian entir awmze nei tak a nei. A chung berah a sen a awm a, chu chuan YMA chu pawl lar tak leh Zohnahthlak tawh phawt chuan kan hriat vek a ni tih a entir. A laiah a var a awm leh a chu chuan pawl thianghlim, mitin huapzo a ni tih a entir leh a. A hnuai berah a dum hian YMA chu mi chanhai, riangvai leh lusunte thian a ni tih a entir.
Tun dinhmuna YMA hian kan thiltum leh dinchan pathumte hrechang lo lek hian chak tak leh ropui takin kan kal ta em? tih hi kan inenlet fo a tul.
YMA chu Politics rawngkai lo, tlawmngai pawl a ni tih hre reng chung hian YMA hi Political platform-a hmang duh hruaitu ikan nei a nih chuan a vanduaithlak ngawt ang le. Kan hruaitu thlan danahte hian Politics rawngkai lo, tlawmngai pawl a nihna i tilang zel ang u.
MHIP LAWMTHU
M.H.I.P Day (Dt.6th.Jul.2011) ni khan kan din champhaphak lawmna atan kan inhmun laiin kan hnatlanga, members 60 lai kan thawk chhuak thei, kan lawm hle. Hemi ni hian kan zawh hman loh deuh avangin Ni 8th.Jul.2011(Friday) khan kan hnatlang chhunzawm leh a, hemi ni pawh hian members 40 lai kan thawk chhuak leh thei a, a lawmawm takzet a ni. M.H.I.P Day pual hian mi inphal /tlawmngai ten thilpek hlu tak tak min pe a :
1. Pi Zaitei _ Rs.200
2. Pu Zamkhawnanga _ Rs.200
3. Pi Thalmeni _ Rs. 50
4. Pu Nghaktea _ Vawksa 1/2 kg
5. Pi Ngaihtiangi _ Amul & Chini
6. Pi Hauthangi _ Antam
7. Pi Hnuntei _ Buhfai
8. Pi Lawmi _ Buhfai
Tin, hnatlangho eirawng min bawlsak tura inthlahrung tak chunga kan ngen leh kan sawm ten chak zawk ang maia phur taka eirawng min rawn bawlsak thin hi kan lawm takzet bawk a ni.
Tlawmngaia hnatlang thawk chhuak zawng zawngte leh phal taka thilpek min petute zawng zawng chungah Kanan Branch M.H.I.P hruaitute kan lawm tak meuh a ni.
Sd/- (C.LALTANPUII)
Secretary
M.H.I.P Kanan Branch
-------------------------------------------------------------------------------------------------------------
Engineer zir dawn
Tv.Lalremsiama s/o T.Lalrotawna chuan Computer Software leh Hardware engineering zir turin a inziak tling ta.. A zirna hmun tur hi Tamin Nadu a ni ang.
Gopal-a
Mumbai-a Mizo nulate hralh thintu Gopal-a chu naktuk hian Aizawl rawn hruai thlen a ni ang.
Joint Service
Champhai Kahrawt Branch KTP te chuan naktuk zan hian Kan Branch KTP te an rawn tlawh dawna, programme chi hrang hrang hmangin Pathian an fakho ang.
Kawng siam zel
Kan Veng lun lai kawngpui chu siamthat hna thawh chhunzawm zel a ni a. Hemi atan hian ni za inhlawhna sum atangin in khatah Rs.400 zel cut tur a ni a, hemi pawh hian a la daih dawn lo nasa niin kan lo hria.
SECTION NEWS
Taitesena Sect. : Kar kalta Zirtawp zan khan an committee-a, an section huam chhungah boruak muanawm leh thianghlim zawk a lo awm theih nan Welfare Committee an din. Chuta an hruaitute chu :
Chairman :Pu Haukhanmunga
V. Chair. : Pu C.Lalmuankima
Secretary:Pu K.Lalhmunsanga
Treasurer : Pu C.Lalsangzuala
Nimin zing khan an section huam chhung bawlhlawh tifaiin an hnatlang nghal bawka, member thawk chhuak an tha hle.
School naupang exam a hnaih tawh avangin an huam chhungah tumahin bengchheng siam lo turin veng chhung mipuite an ngen a ni.
-------------------------------------------------------------------------------------------------------------
Damlo te
# Ramnunsanga s/o Remchhunga chu inrelah a tla a, a awm ruh a sawh khaw lo niin kan lo hria. Tunah hian damdawiinah enkawl mek a ni a, that lam a panzel niin kan lo hria.
# Pi Maria-i W/o Pu Ramlawma K.Sect a mi chu Lung lam that lohna avangin Seven Day Hospital Zotlang ah an in enkawl mek a,hma a sawn zel niin kan lo hria.
# Pi Luahthangi pawh in- check up-in Aizawlah a thang mek bawk.
Editorial......
Hlawhtlinna..
Mi zawng zawng hian kan kawng theuhah hian hlawhtlin kan duh a, vanneih kan duh theuh bawk. Mi hlawhtlingte kawng hi han chhui kir ila, kawng nuam leh kawng zal fai tha taka kal erawh an awm hauh lo thung. An kawng zawha an harsatna tawh lam hmuh kanin chung harsatna an pal tlang tawh hnua an dinhmun tha tak leh awhawm tak chu kan hmu hmasa zawka. An nih ang nih ve kan chaka, mahse an harsatna tawh ang erawh kan tuar peih ve thin lo a ni.
Hlawhtling bik turin Pathianin tumah a duangsa bik lo tih hre mah ila kan hlawhtling thei si lo a, engvang nge ni ang? ‘Harsatna chi hrang hrang kan tawrh peih thin loh vang’ a ni.
ZONET Cable TV chuan Mizo Idol 2011 a thlang leh dawna, Entertainment Champhai District pawhin tun thla ni 26 hian Chhaktiang Lelte a thlang leh dawn bawk. Zai lama tui mi, hetiang intihsiakna hmachhawn tum te chuan a lo hlawhtling tawhsa te tun hun hman dan thlir lovin hlawhtling tura an beihna kawng hi chhui kir zawk a tha hle ang. Kar hnih khat lek practice-a topper nih tum nghal ngawt mai te hi hlawhtlinna hian kawng a hawn tha duh der lo nia..
Tunlai khawvel thiamna sang tak leh mithiam tam tak awm tawhnaah hian eng kawngah pawh hlawhtling tur chuan theihtawp bakah ‘tlem’ san belh leh a ngaih hmel ta khawp mai. Tin, “hlawhtlinna chu pawn lam lang theiah ni lovin chhungril lam atanga intan, mite hmuha par chhuak a ni tur a ni a, chu chu a tlo a, kumkhua a daih thin a ni,” tih hi hriat reng tlak a ni bawk ang.
CHHAKTIANG LELTE THLANNA
Entertainment Champhai District chuan Champhai District chhunga Zaimite promote-na atan ‘Chhaktiang Lelte’ thlanna a buatsaih dawn a. Champhai District huam chhunga zaimi zawng zawngte lo tel vek tura ngen leh sawm in ni e.
Tan hun : Dt.26th July 2011 (Tuesday)
Prize
1st - Bike (mipa tan)
Scooty (hmeichhe tan)
2nd - Rs.20,000
3rd - Rs.10,000
Top ten tan lawmman tha tawk tak siam tum a ni bawk.
Top Ten Offers :
1) Zonet Mizo Idol-ah Top 50-ah an lut nghal ang.
2) AIR leh DDK-ah Artist tura zaina chance pek an ni ang.
FORM LAKCHHUAHNA HMUN TURTE :
1. Pu Zuata Dawr, Dawrkaikawn Kahrawt
2. Nancy Fashion Store, Vengthlang
3. LR.Store, Dawr Veng (Pi Matluangi Dawr)
4. LCN site Office, Awmpui Veng
5. Malsawm Bakery, Bethel Champhai
6. LCN Main Office, Zotlang.
Form hi Rs.10/- kenga lakchhuah tur a ni a, 20th July 2011 aia tlai lovah mahni form lak chhuahna counter-ah thehluh leh tur a ni ang.
Sd/- (DAVID LALTHLAMUANA)
Asst. Secretary
Chhaktiang Lelte Organising
Committee
Champhai District : Champhai
Hriat zauna
Thlan chi hrang hrang
Hmanlai Mizote khan a mihring azirin thlan laih dan bik an nei a, chu’ng te chu :-
1.Lungkuang thlan : -Thlan laih pangngaia laiin a thlan chhuat leh a sir tawn tawnah lung phek an phah chhuak veka, chumi hung chhungah chuan mitthi chu an daha, lungphek bawkin an chhin leha. Thlan laih chhungin tlangval thenkhatin lungphek hi an lo zawng thin. Lungkuang thlan hi mi bik tana siam a ni.
2. Tianhrang thlan : Thlan laih dan pangngaiin an lai phawt a, an duh tawka thuka an laih hnuah a chhuat zawlin lehlam chu thlan sei zawng chenin an ker puk ta vaka. Mitthi pawh phum se lang phak lo tura thukin an kera; a kawngka chu thingin an tung phui leh tlat thin. Hetiang thlan hi Pasaltha leh mi bikte phumna thlan a ni.
Chhirtute ngaihdan....
# Section pakhatah hnatlang an nei dawna, chumi hriattirna chu information mic. atangin kan au thina. An mahni/a hnatlang tura te hriat tura an section information line chauha au mai hi a tawk lo em ni... Section pakhat chauh hriat tur nisi section zawng zawng information line-a au tel ve kher hi a tul lovin beng chheng mai mai a ni..
Pu Editor, eng nge i ngaih ve dan le...?
Het sala....Huat awih loh
@Thla hmasa atang khan kan News Editor Tv.TBC Lalkima chuan a thawh thumna atan Kristian Naupang chanchinbu a la thar ve leh ta...
@Pi Lalhmangaihi pawh thlan hluamin Tuipui kamah a nui thler uar uar ta mai a...
@E heu... Delhi lam sas a lo haw leh ta, U Kimte, kan inang lo leh pek dawn mang e ka ti...
- Tv.DNA N.Sect. Secy
@Omte, kan nu awm loh lai a nia, vacancy a awm a nia.. - VL Rona Ed...
==========================================================
No comments:
Post a Comment