Pathianni hmasaah Printer that loh avangin kan chhuah theih tawh lo. Veng chhung mipui/Kohhran mipui te an zahawm hle. Tunah pawh chhuah thei lo tura kan inngaih tawh laiin Pu Raldokhuma chuan a printer phal takin min hman tir a, a chungah ka lawm tak zet a ni.
==================================================================
PAGE - I
THAWHLAWM....
# Ramthar ip vawi hnih dawhah Rs 33695 hmuh a ni a, kan budget kan la tlin lo deuh. Vawiin lamah pawh pek zel theih a la ni. Kan Kohhran hian tunah hian Tirhkoh 34 kan chawm mek a ni.
# Tukin hi K.T.P Faith Promise lakkhawm hun a lo ni leh ta e.
# Pathianni kalta Pathianram ip lakkhawmah ip 124 tlain sum hmuh dan hetiang hi a ni.
Pathianram 51735; Ramthar 29760; Tualchhung 41373; Biak In 47905; Total 170773
Pathianram ip hi vawiin lamah dawh chhunzawm leh a ni ang.
K.T.P HNATLANG
Kar kalta chhung khan K.T.P member te chu Upa Vanlalnghaka-te Tanky lai chhunzawmin hnatlan leh a ni a, tum li(4), (nilengin) thawhchhuah a ni a, tichuan 8ft laia thuk chu laih zawh a ni ta. Tum li(4) hnatlana Group member te thawhchhuah dan hetiang hi a ni.
Upa KK Group- 14
Upa ZN Group - 13
Upa HC Group - 10
Upa KT Group - 9
He hnatlangah hian ni li(4) thawhchhuah a ni a, tha 46 a lut a, Rs 4000 kan hlawh a ni.
FRAME LEI LAWK
Branch K.T.P chuan member te inneih certificate present a mi tur Frame 8 lai a lei lawk, a inneih chur chur theih a nia.
=========================================================================
Branch K.T.P Committee thu....
DDK RECORDING AUGUST THLA CHHUNGA ZAWH HMAN TUM A NI
Kanan Br. K.T.P - Dt. 21.8.2011 :
Dt. 11.8.2011(Thu) zana Branch K.T.P Committee thu tlem han tarlang ila.
1. Tlangsam Branch kan tlawh tur Preview neih a ni a, kan Branch atanga chanvo nei tur hrang hrang te thei lo tur kan awm lo niin a lang a, tin, Microphone pahnih ken theih nise, Light & Sound Sub. Comt. ah dilna thlen nise tih a ni.
2. Keyboard repair a ngai a, lo buaipui turin Branch O.B te ruat an ni.
3. DDK Recording chungchang ngaihtuah a ni a. August thla chhung ngei hian Recording tih zawh fel hman tura hmalak tum a ni a. Tin, kar khat chhung vel chu Camp neih tur a ni bawk ang.
4. Beihrual thla(September) chhung hun hman dan tur rel a ni a. Pathianni tlai tin fellowship tur a ni ang a, fellowship naah hian kum danga tih ngai lo deuhin hming lam leh thilpek lakkhawm kalpui tur a ni ang. Fellowship programme chu Programme Sub. Comt. in a duang thin ang. Attandance lak tur a nih avang hian Inkhawm kal kim tumte chu Fellowship thulh loh hram tur a ni a, theihtawp chhuah hram hram a ngai a ni e.
=========================================================================
Pathian fakhona hun kan hmang dawn...
TLANGSAM LAM HAWI ILA
Champhai Joint K.T.P in mahni Bial pawn ami Branch tlawh nise atih angin kan Branch chuan Tlangsam tlawh kan tum a, a hun pawh naktuk zan mai khi a ni ta. He huna chanvo hrang hrang neitu te leh tihtur hrang hrang neitu te an inbuatsaih fel tawh a, Pathianin rem a tih chuan naktuk zan chu Tlangsam lam kan pan dawn ta a nih hmel e.
A hun : Dt. 22.8.2011(Zan)
A hmun : Tlangsam Kohhran Hall
Chairman : Tlangsam Branch lam atangin
Tantu : Nl JH Malsawmengi, Comt. Member
Report & Introduction
Branch pahnih Secretary te
Thusawi : Pu B.Rosangzuala
Shortplay : Buaipuitu- Pu K.Lalbiakhlira
Group Zai : Convener-Pu C.Vanlallawma
Solo : Tv Rinthangpuia
Present lo lei turin Pu H.Lalthantluanga leh Tv C.Vanmawia te ruat anni a, motor lo ngaihtuah turin Pu C.Liansanga leh Pu C.Vanlallawma te ruat an ni bawk.
A kal turte chu tlai dar 5:45-ah Bazar-ah kim vek tur a ni a, tlai palh a hlauhawm avangin kan hun ruat hi ngaih pawimawh hram hram tur a ni e.
=========================================================================
F/P ENHO TUR
Vawiin Chawhnu Inkhawm banah Senior Hall-ah Faith Promise en ho tur a ni a, Committee member bial vawnglo te pawh kim taka kal nise.
===========================================================
PAGE - II
Editorial..........
CAMPING
Kan mamawhna leh mamawhlohna
Kan Kohhran chuan Chhandamna Camping a buatsaih dawn a nih kha, chumi tur chuan Speaker pawh biak fel a ni tawh a, October thla lama nei turin ruahmanna pawh kan siam a nih kha. Hemi chungchangah hian ngaihdan a inang lo hle hlawm a. ‘Tul ti’ kan awm laiin ‘tul tilo’ kan awm bawk.
A TUL LOHNA
Kan Kohhran hi Kohhran chaklo tak kan ni khat khawp mai. Kum chanve kan thleng ta a, Kohhran Thlarau lamah chaklo tak kan ni lo. Pathian zarah tual chhungah mi thahnem ngai tak tak kan nei a, tin, Kohhran mite tawngtaina te hian Kohhran mi vawng em em bawk a ni. Helam ngaihtuah hian Kohhranin sum senga camping a buatsaih tur hi a tul vak pawhin a lang lo a, tin, kan mamawh em em ni pawhin a lang lo.
A TULNA
Kohhran Inkhawm leh thiltihnaa rawn thleng phak ngai lo, mamawh nia inhre lo te, tin, mamawh ngawih ngawih hun remchang melh ve reng te, Rawngbawltute zingah ngei pawh mahni nun chingfel thei lo te; hengte tan hian Camping hi a hlu em em a, hnung tawlh leh bosan tawh te’n Lal Isua kan neih leh theih nan a tul a ni.
========================================================================
MEET HMANG VE
Champhai ‘N’ Presbytery K.T.P chuan Nizan atanga tanin Zanin thleng hian Venglai Kohhran Biak Inah Meet an hmang ve dawn. A thlengtu Venglai Kohhran hian Meet Inbuatsaih nan an Branch K.T.P hnenah Rs100000 lai an pe a, Keyboard thar an lei bawk.
KAN LAWMPUI E
Kan member-pui Tv C.Lalpekmawia(Pekpuia) chu tun tum Independence Day Badminton Tournament ah khan Grade ‘B’ ah pahnihna a ni a, kan lawmpui hle. Vawiinah a duh apiangin thla a lakpui theih ang. Nula lam khan lo hre deuh ila.
DDK ZAIPAWL
Committee in a rel angin Thawhtan zan Inkhawm- banah khan member, Zaipawl-a inpekna hun hawn a ni a; hetah hian member 40 chuang awrh an inpe a. Heng mite hi inlak belh tawh chuang lovin DDK Zaipawl member tur an ni ang a, midang chu koh tel an ni tawh dawn lo a ni. Nizanah khan Kohna hmasa ber siam a ni a, remchang hmasa berah Zaipawl Camp hi buatsaih ani ang.
-------------------------------------------------------------------------------------------------------------
KOHHRAN HMEICHHE COMMITTEE THU
1. Thla khata tha khat atan pangpar huan thlawh leh tur a ni a, a hun a tan, Sept. 3, 2011 a ni ang.
2. Pangpar chi tha lei belh tur a ni a, maw lo phur turin Pi K.Vanlalengi, Pi Thangseii leh Pi C.Thanzuali te ruat an ni.
3. Kohhran Hmeichhe inkhawmah Chairman in thusawitu hun tawp pe lovin, hruaina hna hi Chairman in a keng tlang tawh ang.
-------------------------------------------------------------------------------------------------------------
MISSIONARY A INCHHAL, MI BUMHMANG
Lalthakima (Jerry-a inti), tuna Orissa Khandamal, Odi, Slum Area hmuna Missionary Volunteer-a kal nia inchhal chu Pathian thu hmanga dawta mi bum tur zawng thin a ni tih hriatchhuah a ni a. Hetianga a lo bum tawh zingah hian Chief Minister nupui Lal Riliani pawh a tel nia hriat a ni.
Chief Minister te nupa hian kumin February ni 19-a Guwahati an tlawh tum -in, Khandamal dist-a missionary hnathawkten an rawngbawl dan chanchinte an sawi a, heng mite tan hian CM te nupa hian Inverter leina an pe a, chu chu Jerry-a pawh hian a lo hre ve nge, CM nupui Lal Riliani’n, ‘Mizoram in rawn chuan chhuah hunah min la rawn tlawh ve ula’ a tih avang leh an chunga lawmthu a sawi a duh avangin, CM Bungalow-ah hian July ni 28, 2011 khan a kal niin a sawi.
Missionary hna thawka rawng an bawlna chanchin tamtak sawiin, a insawi khawngaihthlak hle a, chutiang taka Pathian rawngbawl leh thahnem ngai tak nia inchhal a nih avang chuan CM nupui hian khawngaihin Rs.2,000/- leh Inptechei a lo pe a. CM te nupain Guwahati an tlawh tuma Major ST Dula te nupa leh Mr. & Mrs Emmanuel-a te nena an thlalakho chu Major ST Dula, tuna Guwahati-a awm mek tan an thawn tel bawk a ni.
Hemi hnu hian ngaihthat lohna eng emaw a awm avangin, Guwahati Mizoram House Liaison Officer leh Major ST Dula te chu biakpawh an ni a, chutiang ang mi an hriat loh thu leh tun thlenga engmah an la dawn loh thu an sawi avangin, Jerry-a nia inchhal hi Pathian thu hmanga dawta mi bum tur zawng thin a ni tih hriatchhuah a ni, thudawnna chuan a ti.
(Kan Pathian thu hi chu a thleng dik zel a nih hi)
===========================================================
MASS NEWS
# T.Section lam pawh an Committee ve tawh a, sum khawn dan tur leh budget te pawh an ruahman tan tawh. Anni Section hi chu muangmarin an che a, a hunah chuan an thawm a na ber mai thei a ni.
# Section dang pawhin hma an la chhunzawm zel bawk.
# Section tin a Krismas & Kumthar ruai hi theh tur a nih avangin Section tin hruaitute leh Collector te mawhphurhna a sang hle a, kan tan chhoh chu a hun viau tawh a ni.
Hnatlang : Niminah khan Ramthar huanah Thingthupui bul vel thlo faiin hnatlang neih a ni a, mi 13 vel an thawk.
===========================================================
THUNAWI :
# Tun thleng hian hnatlan nia Chana ka ei kha a la lang a, bawp ka la khawkherh veng veng thin.
-Nl Kawkte-i
# Ka vanglaia Chepa ka perhthlak leh kan motor Brake fail-a a jam ka kam hman kha an sawichhuak fo mai hi ka ning ta khawp mai.
Nl Panzeli
=========================================================================
Pathian zarah kan chhuah leh thei ta, a va lawmawm thin em.....
