SOLDIER OF UNFORTUNATE
A chang chuan nun hi a linglet a,
a chang leh a letling thin a ni. Ka duty-na post atang chuan ka awmna vel lum
lutuk leh sa lutuk chu tlanchhiatsan ngaihna a awm chuang lo. Pathian hruaina
zarah kum 10 dawn lai ka lo thawk ve ta. He hna ka thawh chhung hian harsatna
em em ka tawk lova, ka taksa a chak tha a, ka duty hlenchhuah leh rinawm taka
ka hnathawh chu ka hlimna ber a ni thin. Sipai tura han kal tirh lai vel kha
chuan ka lung hi a leng ve deuh thin a. Mimal ngaih tur hre vak lo mah ila, kan
veng leh kan in leh kan sul hnu hrang te chu ka ngaihtuahna la tu an ni thin.
Sipai nana na chu inkhuahkhirhna
a nasa a, a chang chuan lunglen bo thak te hian kan tal ve bawk thin a; hremna
leh tihtur rit tak tak kan chunga a lo thlen chang te hian lunglen hre lek lo
hian chung thil chu kan ti mai thin. Mahse a chang chuan hetiang reng hi a ni
bik lem lova, thla eng tak hnuaia 'santiri' hi chuan 'kha khan pasal a nei ve
tawh ang em aw..' tih te hi rilruah a rawn lang a, a chang leh thian tha te
nena ram kan tuanna tlang te kha rilru mitthlaah a rawn lang ve zut zut thin.
Hun a lo in her zel a, kei pawh
‘chhuti’ la in vawi 2/3 lai Mizoram lamah ka chuang chhuak ve ta. Khuanu duan
rengah hmangaihna hi thil pawimawh tak a ni ang tih leh chu chuan mihring chu
pumkhata siamin puitlingah a siam ang tih hi ka ngaihtuah ngai hauh lova, hmel
duh deuh leh ngaihzawng deuh te chu nei ve thin mah ila ka rilru thuk tak hi an
luah pha ngai hauh lo.
Mahse tun thlenga ka nun luahkhattu, ka nunna zawng zawng neitu hi
ka tawn ni chuan hmeichhe thianghlim ber leh Angel te pawhin an tluk loh hial
tur ni hian ka hmu a. Chu thianghlimna zawng zawng neitu chu a kut ka vawn a,
then hlau tak chunga ka pawm vawng vawng lai te kha thihnain ka mit a chhin te
a nih ngawt loh chuan tuma hmuh ve theih loh tur si hian ka hmu reng tawh dawn
a ni. Ngai leh thlahlel tak chungin ka kalsan a ngai leh thin te kha a chang
chuan ka hrethiam lova, ka hna atang khan ban mai te ka duh rum rum a nih kha…
Duty-na hmun te chu nisain lum thin mahse, vawt em em hun te lo awm thin mahse
ka bulah a awm tlat thin ni hian ka hria a, hrehawm reng reng hi a awm lo.
Mahse ka Chhingpuii rilru hi kha
tih hunlai atanga tun hun thleng hian ka hrethiam thei mawlh lo. Vawi ¾ vel lai
chu min kalsanin min then a…mahse maw..a mak lutuk. Ho te teah titauin min then
thin mahse Zoram ka rawn chhuanchhuah hian a tel lo chuan ka nung thei lo. Amah
avangin ‘Chhuti’ ka la a, a mah avangin sum leh pai leh hun tam tak ka seng a;
mahse chung zawng zawng chuan a ni nen kan inrem a, a kut nem tak ka vawn
theihna hi an phu chuang lo. Tichuan, min then leh mai hlau tak chungin inneih
ka rawt a. A ni, a dik chiah, ka Chhingpuii hi ka then thei ngang lo a ni.
Ngaihzawng dang a neih thu leh innei mah ila a rilruah a thih theih loh tur thu
min hrilh pawhin kum khuaa ka Chhingpuii then ai chuan chung zawng zawng chu
menah ka thlak mai ang…
Inneih kan hmang zo a, an khaw
lama kan zin phei ni te kha ka va hlim em. Hmangaihna hian ka nun chu a chawm
a, ka nung hliah hliah in ka inhria a, a bulah chuan ka inring tawk a, a kut
vuan chung chuan tih theih loh ka neih hi ka ring lo reng reng. An lovah kan
feh a, nisa vawl vawl hnuaiah a biang tai tek leh a thlan dar tui ang lo far
chhuak te kha khawvela thil mawi tehkhin tur dang hi ka hre lo. Fanghma a vel
a, min ei tir lai te khan nun hahdam zia hi ngaihtuah ngai lovin a takin ka
chang a, nun hrehawmna hi ka ngaihtuah pha lo hrim hrim.
Mahse..chung zawng zawng chu
thawnthu mai an ni ta. He duty post hrehawm tak, hremhmun unaupa ang maia
hrehawm atang hian chung thil te zawng zawng chu ka ngaihtuah kir a, ka nun hi
kalsan ram ang mai hian a ro ngawih ngawih a. Thli ro takin vut a rawn chhem
khuk te chu Pathianin ka nun tehkhinna tura a rawn tirh nite hian ka hria a,
ava na em. Kha’ng hunlai zawng zawngah khan ngaihtuahna in anglo tak tak
pahnihte chu kan lo inkawp a, chu’ng mite vek chuan inneih thu kan lo thlung a.
Keiin engkim kalsana ka vawn laiin a ni ngaihtuahna erawh chu a dang daih thung
si. Engkim hre sa mah ni ila, kan inneih chuan a reh ve mai ka lo ring thin a
nih kha.
Inneih hlim, nupa nun hlim lai tak
pawhin mi pa dang a be reng tho a; chu chu a bula ka awm lai reng pawhin a ni.
A phone ka laksak chung pawhin ka khap thei lo. Ka Chhingpuii hian eng nge maw
a hriat a, heti em em a ka chunga hlei a len mai ni le. Tunah ka kalsana, ka
awmlai maha kha tianga atih chuan ka awmlohah phei chuan…ka ngaihtuah ngam lo.
Ka thin phu hi a nasa lutuk a, a puak chhuak dawn ni ber te hian ka hre thin.
Khawvela mipa vannei ber nia ka lo inngaih lain vanduai ber ka lo ni. Hmelma
silai mu tawn aia a nepna tur bik ka hre lo. Kei sipai, India sorkar-in ram
venghim tura a thlan hi hmangaihna avangin ka ding thei lo a ni ber a, thlaler
vaivut thli lum tak chuan ka mit atanga mittui khawhar tak rawn chhuak chu tih
ngaihna an hre vak bik lo. Amah vanga beiseina ka lo neih ve zawng zawng te chu
a rawn chhem bo va, amah leh kan fa duhawm tak tak lo piang tur te tana ka
inbuatsaih vena zawng zawng te chu hliahkhuhin a awm ta. A chanchin ka hriat a
piangin ka rilru natna tizualtu an ni zel ta si. A hma chuan inneihna thu sawi
turte, a titau thlem tur tein ‘Chhuti’ ka la thin, mahse tunah chuan Inthenna
thu sawi fel tura ka haw chu ka tih tur dik tak niin ka hre ta. Hringnun hi a
chang chuan a letling a, a chang leh a linglet thin a nih hi….
