Hun a inher zel a, turni lo her chhuakin furpui kan tawng a, favang hun thawveng nuam tak kan hman hnuin thlasik kan lo tawng leh ta. Thlasik hi chuan mizo te rilruah engtin emaw riau hian awmzia a nei a. A chhan lian ber mai pakhat pawh KRISMAS hun a awm vang hi a ni ngei ang le. Khawvel hi he hun hmang tur hian a inbuatsaih a. Mizote tan he hun hi a hlu zual em aw a tih theih.
A chhan bul pui ber pakhat atang hian tunlai leh hmanlaia Krismas kan hlut dan danglam theih dan lo sawi hmasa ila.
Hmanlaiah chuan....kut hnathawkin ei an zawng a. Lo an nei a, buh, vaihlo leh thil dang tam tak an ching a, an hun neih zawng zawng kha LO a ni mai. Tin, lo khaw tam takin lo neih an bansan hnuah pawh mi hnuaia inhlawh leh hnadang thawkin rim takin mi tam zawkin hun an hmang a. Tin, Sa an ei khat em ema, duh hun huna lei tur a awm lo a, awm pawh nise duh hun hun a sa lei thei tur khan pawisa an nei lo a ni. Tin, Krista lo pianni, min tlan tura he khawvel a lo kal ni champha phak hi a lawmawm em em a, a nghahhlelhawm lo thei lo a ni. Kan hnung deuhah pawh khan kan vengah chuan kar khata sa vawi hnih lai lei te kha chu kan sawi duh thin em kha. Chumai ala ni lo. Neih zawng zawng sengin thalai ten lehkha an zir a. An khuaah zirna sang zawk a zir theih loh avangin hmun dangah lehkha an zir a, chungte leh an chhungten an nghahhlelh thin pakhat chu Krismas hun hi a ni bawk. He hunah hian Chhungkua an inhmu khawm thin a, hmundanga lehkhazir leh eizawnna avanga awmbo te leh an chhungte, leh thenrual thate chu inngai em emin an inchibaia, Krismas chibai chu sms mai nilovin a tak ngeiin an inchibai thin a lo ni. Chuvang chuan Krismas; hahchawlhna hun, duh tawka sa leh buhchang rum ei theihna hun, Lal piang lawma hlim taka zai vawrna hun, hun hlimawm, hman liam hnua lung tileng em em mai kha a ni a. Chuvang chuan hmanlai deuhah phei kha chuan Krismas hun hi a va mawiin a va hlu leh zual dawn tak em.
Zamtei pawhin Biak In kawta Ran in chu thla a lakpui uluk khawp mai
Tunlai deuhah chuan....khi'ng a chunga kan sawi te nen khian a danglamna chu a tam vak lovang a, mahse hnate kan thawk tam tawh lo em ema, tin duh hun hunah(khawpui deuhah chuan) sa te kan lo ei a, hei hian a bikin thalaite rilruah nghahhlelhna a ti nep em aw ka ti thin.
Awle, engpawh nise, engtikawng pawhin Krismas hun hi a hlu a, Krismas-in a ken tel; Hnahlak te, Thinglak te, Thawmhnaw thar neih te leh tuma mitmei veng lova men pawh meng phal lova, Civil Bass tak tak a 'Aw ava mawi em he ni lawmawm hun tawi te hi' tih han sak thuai thuai te chu Krismas tihlutu vek an ni tawh. Tin, Thalai ho Carol te, mizo chhang ban ngei mai Kohhran hoin kan han eiho te hi he hun hmanliam hnu a khawhar tizualtute zingah chuan tawrhhlelhawm ber zing ami an ni ngei mai.
Tichuan, khi'ng thu khi a kam keu nan ka han tarlang a, kan Kohhran Krismas kan hman dan tlangpui ka han Report ang e.
Dt.24.12.2011(Urlawk ni)-ah chuan a nghakhlel zual kan ti dawn nge, a nghal fal deuh kan ti dawn? Chungmite chu tumah pawh insawm chuang lovin Biak In velah kan tal bal hlawm a. Khuang dahna te chu kan siamtha a, Sa suahna fianpui awng te chu a fawng kan siamtha bawk a. Section tin ten an mamawh tur Kohhran bungbel chu kan sem chhuak a. Tin, Sunday School Hall-ah Krismas lenkhawm a awm dawn avangin chungte chu kan singsa in thutthlengte kan remfel bawk a. K.T.P lamin lenkhawm hi kan thlen dawn avangin Thingpui te kan chhuang lawk a, motor-in thingte kan phur bawk a. A hma daih tawh atangin Biak In kawtah Ran in kan siam a, kan uluk ve hle a, tin, banner te kan siam a, kan theih ang tawk leh kan remhriat ang tawk leh kan pawisa neih ang tawkin Biak In chu kan han chei ve bawk a. Tichuan tawngtaina nen Krismas hmachhawn tur chuan kan inpeih thawkhat a. Mahse pawi tak mai pakhat chu kan vengah mithi an awm zawn deuh avangin K.T.P lam chuan hla kan zir thei lova, a pawi hle. Mahse hemi tlaiah hian NPSS Youth for Christ ten Pu K.Lalbiakhlira hovin hla an zir a, music track nen an uluk khawp mai. Tin, Pu C.Vanlallawma hova Group zai turte pawhin hla an zir ngawrh hle.
Bazar chungah Street Service kan hmang a
Lo in post hmanhmawh a, chuan Hmangaihtei khi a ei tui hmel khawp mai.
Duh aiin a lang chiang a nih khi!!!!!
Tluanga te pahnihin(Tluanga+Tluanga) boruak an siam khawp mai
Pu Lianvela khian min rawn tel pui a, a muthlu miah lo nia
Rampuia pawh thla lain a tang khawp mai
Goup zai an ni e.
Zanah chuan Biak In khat mawi tawk vel kan Inkhawma, zai erawh a tui hle. Tin, Inkhawm bana lengkhawm pawh a mawi tawk chu an awm a, mahse an tui hle. Hemi zanah hian kan veng boruak a tha hle a, zurui han au teng vel pawh an reh dak mai. K.T.P AW chanchinbu chhutna lamah erawh chuan Editor tawiawm tu an tha khawp mai.
Banner pawh chhungkaw hrang hrangin thla an lakpui nasa khawp mai..
A tuk Krismas niah chuan Inkhawm kan tam hle a niang, kan Chairman Upa Vanlalnghaka chuan 'Krismas Ni a kan inkhawm tam ber tum a ni awm e' a ti hial a, mi 1200 vel lai kan inkhawm a ni. KTP OB leh thingpui lum tura ruat mi tlemte te erawh inhnuai lamah buai namenin kan buai lova. Inkhawm ban rual erawh chuan thingpui chu kan peihfel hman hram a. Tichuan inchunglama duty ten ARTUI KAN INDAIH DAWN LO an rawn tih zet chuan mang a ang duh hle a, mahse a mak khawp mai kan ei bang tlat.!!!! Chawhnu inkhawm pawh kan tui a, Inkhawm banah Bazar chungah Street Service K.T.P ten kan hmang a, a nuam hle. Zai kan tui bawk a, a solfa lam pawh kan ngaihtuah lo. A bu nasa a piang kha an bass thum hmel tawh mai a ni. Zan Inkhawm pawh a nuam khawp mai. Zan Inkhawm a ban hla chu a tla tha khawp a. T.Upa GLK Thanga'n thu a sawi a, ban hla ah hian 'Lal pian hun lawmawm tak chu kan thleng leh ta' tih hla a thlang a, vawi 10 chuang lai kan la nawn. Inkhawm ban lengkhawm pawh kan tam hle a, kan vaiin kan lam a, kan hlim khawp mai.....PATHIAN CHU FAKIN AWM RAWH SE.
Kan Biak In pawh zanah chuan a nalh khawp mai.
Thawhtan ni chu Krismas Ruai Ni a ni. Section tinte'n zing atangin Ruai kan buaipui mup mup a. A then an lo in au el deuh a, a nuam duh khawp mai. Inkhawm chu kan tam hle reng a. Tlaiah ruai kan han theh chu Section tinte kan hnianghnar tlang hle. Taitesena Section lam an thawm a ring khawp a, nupa te tein an lam vel a, an thawm pawh a tha khawp mai. Hetiang hi Section hrang hrang ruai theh dan a ni.
Neuva Sectin : mi 320
Vanapa Seciton : mi 580
Taitesena Section : mi 160
Khuangchera Section : mi 350
Zan Inkhawm leh lenkhawm erawh zawng kan tui hle tih hi kan thu kharna nimai teh se.
